ភ្នំពេញ៖ រដ្ឋបាលជលផលនៃក្រសួងកសិកម្មបានជម្រាបជូនដំណឹងដល់បងប្អូនប្រជាពលរដ្ឋដែលមានបំណងចង់ធ្វើត្រីប្រហុកអាចអញ្ជើញទៅទិញត្រីដើម្បីធ្វើប្រហុកបានចាប់ពីថ្ងៃទី១២ រហូតដល់ថ្ងៃទី១៦ ខែធ្នូ ឆ្នាំ២០២១។
ការជូនដំណឹងរបស់រដ្ឋបាលជលផល ដោយយោងលើការសង្កេតតាមដានកំពស់ ទឹកដែលហូរចេញពីបឹងទន្លេសាប ពិនិត្យឃើញថា គន្លងដាយនៅ តាមដងទន្លេសាប ក្នុងភូមិសាស្ត្រខេត្តកណ្តាល និង រាជធានីភ្នំពេញ អាចនេសាទត្រីបានច្រើនចាប់ពីថ្ងៃទី១២ រហូតដល់ ១៦ ខែធ្នូ។
រដ្ឋបាលជលផលលើកឡើងថា៖ «សូមអញ្ជើញបងប្អូនប្រជាពលរដ្ឋដែល មានបំណងដូចជា ការធ្វើប្រហុក ផ្អក ឬត្រីឆ្អើរ ជាដើម សម្រាប់ទុកបរិភោគប្រចាំឆ្នាំ សូមមេត្តាអញ្ជើញមកទិញត្រីឱ្យ បានរួសរាន់ តាមពេលវេលា និងទីកន្លែងដូចខាងលើ» ។
ជាមួយគ្នានេះរដ្ឋបាលជលផលក៏សំណូមពរឲ្យអាជ្ញាធរមូលដ្ឋានគ្រប់ជាអ្នកពាក់ព័ន្ធជួយបង្កលក្ខណៈងាយស្រួលដល់ប្រជាពលរដ្ឋក្នុងការធ្វើដំណើរស្នាក់នៅ និងដឹកជញ្ជូនផលិតផលត្រូវបានដោយរលូន និងអំពាវនាវដល់ប្រជាពលរដ្ឋ អនុវត្តតាមការណែនាំរបស់ក្រសួងសុខាភិបាលអំពីវិធានការការពារមេរោគកូវីដ-១៩ផងដែរ។
ប្រហុកគឺជាម្ហូបអាហារដ៏ពេញនិយមមួយរបស់ជនជាតិខ្មែរ វាត្រូវបានធ្វើពីត្រីដែលផ្អាប់ទុកជាមួយអំបិលដែលធ្វើឱ្យមានរសជាតិប្រៃនិងមានក្លិនខ្លាំង។ ដោយសារមានក្លិនខ្លាំងប្លែកពីគេនេះគេបានដាក់រហស្សនាមថា "ឈីសខ្មែរ" ៕
